Gitun-an sa House prosecution panel si kanhing Department of Education kon DepEd Assistant Secretary ug spokesperson Atty. Michael Poa isip posibleng hostile witness sa impeachment trial ni Vice President Sara Duterte.
Sumala ni House trial spokesperson Rep. Zia Alonto Adiong, importante si Poa nga testigo sa isyu sa confidential funds sa DepEd niadtong kalihim pa si Duterte.
Si Poa usa sa mga opisyal nga mitubag sa Audit Observation Memoranda o AOM sa Commission on Audit o COA bahin sa paggamit sa confidential funds sa DepEd.
Matud ni Adiong, makatabang ang testimonya ni Poa sa pagpasabot kung giunsa pag-atubang sa DepEd ang mga audit findings ug mga dokumento nga may kalabotan sa maong pondo.
Gitandi usab ni Adiong si Poa kang OVP Assistant Secretary Lemuel Ortonio, nga una nang gipresentar sa prosecution isip hostile witness.
Apan giklaro niya nga ang Impeachment Court gihapon ang adunay katapusang desisyon kung kuwalipikado ba si Poa nga ideklarar isip hostile witness.
Ang isyu sa DepEd confidential funds kabahin sa Article I sa impeachment complaint, nga nagtuki sa giingong sayop nga paggamit, pagwaldas ug iregular nga liquidation sa confidential funds sa OVP ug DepEd.