MALAYBALAY CITY, BUKIDNON — Hugot nga misupak ang pipila ka mga botante sa lalawigan sa Bukidnon nga mapalagpot sa katungdanan si Vice President Sara Duterte taliwala sa nagpadayong impeachment trial, samtang nanawagan usab sila nga dili na usab i-oktaba ang umaabot nga Barangay and Sangguniang Kabataan Elections (BSKE).
Sa pakighinabi sa Bombo Radyo Malaybalay kay Rodrigo Galvez, usa ka lokal nga botante sa dakbayan sa Malaybalay, gipahayag niini nga dili angay i-impeach ang Bise Presidente. Hinuon, buot niya nga modagan kini isip Presidente sa umaabot nga 2028 presidential elections tungod sa pagtuo nga mas mapalambo ug madumala niini nang maayo ang nasod.
Gisegundahan usab kini sa laing botante nga si Elma Neri, kinsa nag-ingon nga dako ang matabang ni VP Sara sa pagpadayon sa kalinaw sa nasod, katumbas sa mga nahimo sa iyang amahan nga si kanhi Presidente Rodrigo Duterte.
Sa pikas bahin, gipadayag usab sa mga botante ang ilang pagprotesta sa pwesto batok sa posibleng pagkalangan o pag-oktaba sa eleksyon sa barangay ug SK. Matud ni Galvez, kinahanglang madayon ang botohan aron makapili og bag-ong mga lider nga makahatag og kabag-ohan ug makasulbad sa nagpadayong kalisod ug problema sa ekonomiya.