Balhog sa bilanggoan ang upat ka indibidwal human malampusong napuhag sa Philippine Drug Enforcement Agency (PDEA) Bukidnon ang usa ka giingong drug den sa Purok 2, Kapalaran, Dangcagan, Bukidnon, atol sa drug buy-bust operation niadtong milabay’ng adlaw.
Nasikop sa operasyon ang usa ka giingong drug den maintainer nga giila sa alyas “Mak,” 36 anyos, ulitawo, walay trabaho, ug residente sa maong lugar.
Lakip sa nadakpan si alyas “Rachel” Babaye 35 anyos, minyo, tindera sa usa ka tindahan, ug residente sa Purok 4 West, Kibawe, Bukidnon.
Si alyas “Rick,” 29 anyos, minyo, mag-uuma, ug residente sa Purok 6, Bugwak, Dangcagan, Bukidnon; ug si “Jay,” 33 anyos, adunay live-in partner, ug nagtrabaho isip internet technician.
Nakumpiska sa mga operatiba ang pipila ka pakete sa gituohang shabu nga mo timbang sa 5 gramos nga adunay standard drug price nga P34,000, lakip ang ₱500 nga drug buy-bust money nga gigamit sa transaksyon, ingon man ang mga nagka daiyang drug paraphernalia.
Atubangon sa mga dinakpan ang tukmang mga kaso kalabot sa Sections 5, 6, 7, 11, 12, ug 15, Article II sa Republic Act No. 9165, o Comprehensive Dangerous Drugs Act of 2002.