Gikaingong nahulog sa irrigation canal ang usa ka 4 anyos nga batang lalaki. Matud ni Edmar Pacquiao, Radio Operator sa City Disaster Risk Reduction and Management Office (CDRRMO) Valencia City, sa higayong nahibal-an niini nga dunay bata nga nahulog pasado alas 12:31 sa udto, gilayon silang nagpahigayon og operasyon.
Dul-an na matud pa duha ka oras ang milabay nga wala pa makit-i ang batang lalaki nga nahulog sa kanal sa Purok 18 Malabuaya, Brgy. Batangan, Valencia City, Bukidnon.
Sumala ni Pacquiao, usa ka lumad nga bata ang nalunod diin gikaingong gabaklay-baklay sa kilid sa irrigation nga kanal nga walay nagbantay, hinungdan nahulog kini.
Kasamtangan nagpahigayon og retrieval operation ang CDRRMO Valencia diin gipasirad-an usab ang ibabaw nga bahin sa tubig aron daling makita ang maong bata.