Gitun-an sa House prosecution team ang posibilidad nga kunhuran ang ihap sa mga testigo nga ilang ipresentar sa impeachment trial batok kang Vice President Sara Duterte aron mapadali ang proseso.
Matud ni House Prosecutor Joel Chua, ilang susihon kung igo na ba ang kalig-on sa kaso aron dili na ipatawag ang mga testigo nga ilang tan-aw mahimong makapalangan lamang sa proceedings.
Bisan pa niini, gipasabot ni Chua nga dili nila gustong madugay ang pagdungog, apan dili usab nila isakripisyo ang importanteng mga ebidensya nga gikinahanglan sa ilang kaso.
Samtang,Andam usab ang House prosecution nga mosunod sa bisan unsang iskedyul nga itakda sa Impeachment Court.
Matud usab ni House Prosecutor Representative Terry Ridon, wala silay pagsupak sa pagbalhin sa oras sa pagdungog gumikan gusto usab nila nga mapadali ang pagdungog ug mahuman ang presentasyon sa ilang mga ebidensya sa labing sayong panahon.
Gisugyot usab ni Ridon nga tun-an ang posibilidad nga madugangan og usa ka adlaw ang impeachment trial, aron mahimong upat ka adlaw matag semana ang pagdungog.