Bagsak sa selda ang usa ka 28-anyos nga lalaki nga giila isip Street Level Individual (SLI) human nadakpan sa hiniusang buy-bust operation sa kapolisan sa Purok 6, Barangay Poblacion, Damulog, Bukidnon niadtong Agosto 18 sa gabii.
Subay sa report ni Bukidnon Police Provincial Office (Buk PPO) Provincial Director PCOL Oliver Sotto Navales, ang maong opersayon gipahigayon sa Damulog Municipal Police Station Drug Enforcement Unit kauban ang 2nd PMFC, Provincial Intelligence Unit, ug 1003rd MC RMFB 10. Nakumpiska gikan sa suspek ang upat ka sachet sa giduhatang shabu nga nagtimbang og 0.4 gramo ug nagkantidad og ₱2,720, kauban ang buy-bust money ug batik coin purse.
Gidala na sa Bukidnon Provincial Forensic Unit ang mga nakuhang ebidensya alang sa examination, samtang ang suspek kasamtangang nagpondo sa Damulog MPS ug nag-atubang sa pormal nga kasong paglapas sa Sections 5 ug 11, Article II sa Republic Act 9165 (Comprehensive Dangerous Drugs Act of 2002).