Nag-atubang karon sa kasong pagpangawat ug paglapas sa Comprehensive Dangerous Drugs Act of 2002 (RA 9165) ang usa ka 30-anyos nga lalaki human kini masakpan nga nangawat sa usa ka establisemento ug nakuhaan pa og illegal nga tambal sa Purok 6, North Poblacion, Maramag, Bukidnon niadtong Agosto 18 sa gabii.
Subay sa report ni Bukidnon Police Provincial Office (Buk PPO) Provincial Director PCOL Oliver Sotto Navales, dali nga girespondehan sa Maramag Municipal Police Station ang tawag gikan sa tag-iya sa establisemento bahin sa nagpadayon nga pagpangawat. Sa pag-abot sa kapolisan, naabtan ug gidakop ang suspek samtang nagbitbit sa usa ka sako sa nakuha nga mga metal sama sa brass, copper, ug silver.
Gawas sa mga metal ug mga gamit sa pagpangawat katulad sa kutsilyo, wrench, ug pliers, nakahimo usab ang suspek og kadaot sa duha ka stand air conditioner nga gibanabanang nagkantidad og ₱100,000. Atol sa gihimong pagrikisa sa kapolisan human sa pag-aresto, nakuhaan pa gyud ang suspek og tulo ka sachet sa giduhatang shabu nga nagtimbang og 0.5 gramo ug mga gamit sa pagpanuyop.
Tingkagol na sa selda sa Maramag MPS ang suspek samtang ginaandam ang pormal nga mga kasong kriminal batok kaniya.