Giaprobahan sa Sangguniang Panlungsod sa Malaybalay alang sa ikaduhang pagbasa ang proposed ordinance nga nagtukod sa Malaybalay City Children’s Special Medical Care Assistance Program alang sa mga batang adunay seryoso, chronic, life-threatening ug congenital medical conditions.
Tumong sa maong programa nga mahatagan og pinansyal, medikal ug sosyal nga suporta ang mga batang nanginahanglan og espesyal nga pag-atiman, lakip ang mekanismo sa pag-avail sa tabang ug paglaan og pondo alang niini.
Giklaro usab sa deliberasyon nga wala pa maapil sa kasamtangang budget sa siyudad ang pondo alang sa maong programa, apan gilauman nga maaprobahan ug mapondohan kini sa 2027 budget.
Subay niini, gikwestiyon ni Konsehal Flaviano Gapol Jr. kung aduna na bay datos sa gidaghanon sa mga batang apektado sa mga sakit nga sakop sa programa.
Apan matud sa proponent, wala pa’y kompletong listahan sa mga bata nga mahimong benepisyaryo tungod kay wala pa hingpit nga mamonitor ang mga kaso sa siyudad.
Samtang, gi-amendahan sa konseho ang proposed ordinance aron kini i-sponsor sa tanang miyembro sa 10th Sangguniang Panlungsod. Walay misupak sa amendment ug giaprobahan kini sa konseho.