Gipadayag sa House prosecution nga ang testimonya sa OVP special disbursing officer Gina Acosta sa giingong pagbalhin sa P125 milyon nga confidential funds ngadto kang Col. Lachica usa ka dakong kalapasan.
Matud sa House prosecution pinaagi ni House Prosecution Spokesperson ug Lanao del Sur Red. Zia Alonto Adiong nga importante ang testimonya ni Acosta sa kaso batok sa paggamit sa confidential funds, ilabina sa giingong paglapas niini sa Joint Circular.
Dugang pa sa kampo niini, gikumpirma ni Acosta sa impeachment trial nga adunay instruksyon gikan kang Vice President Sara Duterte nga ihatag kang Col. Lachica ang P125 milyon human kini ma-encash.
Sumala sa prosecution, si Col. Lachica maoy gitahasan sa pagdumala sa mga programa nga ipatuman gamit ang confidential funds. Gipamugos niini nga sayop ang paghatag sa maong pondo kang Lachica, imbis nga ang designated officer mismo ang magdumala ug mo-liquidate niini.
Gidugang usab ni Adiong nga ang testimonya ni Acosta nagpakita usab sa giingong papel ni Vice President Sara Duterte sa pagdumala sa confidential funds.
Matud pa, giingong gipangayo sa OVP kang Acosta ang pagkamaunongon sa Vice President isip special disbursing officer, lakip ang pagsunod sa mga instruksyon nga may kalabotan sa pondo.
Samtang, giakusahan sa House prosecution ang maong pagbalhin sa katungdanan isip illegal delegation of duty, tungod kay dili lamang basta-basta mahimong itugyan sa laing tawo ang usa ka mandato nga gitakda sa polisiya ug regulasyon sa usa ka ahensya.