Misaka sa rekord nga P38.3 trilyon ang kinatibuk-ang resources ug assets sa financial system sa Pilipinas niadtong Hunyo, sumala sa datos sa Bangko Sentral ng Pilipinas o BSP.
Wala malakip sa maong kantidad ang resources ug assets sa sentral nga bangko.
Misaka kini og 8 porsyento kumpara sa miaging tuig ug mao na ang pinakataas nga natala sukad 1970.
Naglangkob ang maong resources sa cash, loans, deposits, capital, investment securities ug reserves sa mga financial institution.
Ang mga bangko ang nagkupot sa kapin 83 porsyento sa kinatibuk-ang resources sa financial system, nga miabot sa P32 trilyon human mosaka og 10 porsyento.
Samtang, misaka og 46 porsyento ang resources sa digital banks ngadto sa P208.4 bilyon, samtang mitubo og 38 porsyento ngadto sa P587 bilyon ang resources sa rural ug cooperative banks.
Ang mga nonbank financial institutions sama sa investment houses, pawnshops, insurance companies ug state-run pension funds, mitubo usab og 3 porsyento ngadto sa P6.3 trilyon.
Matud sa mga regulator, manageable pa alang sa financial stability sa Pilipinas ang epekto sa gubot sa Middle East, apan posible gihapon kini nga makaapekto sa inflation, external financing ug economic growth kung magpadayon ang tensiyon.