Lauman ang dakong usbaw sa presyo sa diesel ug gasolina sa sunod semana tungod sa pagsaka sa global oil prices, base sa kalkulasyon sa Mean of Platts Singapore o MOPS ug foreign exchange rates gikan Agosto 10 hangtod 13.
Posibleng mosaka og P3.75 hangtod P4.25 matag litro ang diesel, samtang P2.50 hangtod P3.00 matag litro ang gasolina.
Matud sa oil industry source, nakaapekto sa pagsaka sa presyo ang paghuyang sa paglaom sa peace deal ug sa pagbalik sa shipping traffic sa Strait of Hormuz, lakip ang hulga sa pagkunhod sa global oil inventories ug limitado nga suplay gikan sa Middle East Gulf ug Black Sea.
Posible usab nga mosamot ang pressure sa global crude supply tungod sa mga sanction-related disruptions, samtang ang diesel padayong naapektuhan sa supply risks sa Middle East ug limitado nga exports gikan sa Russia.
Kasagarang ipahibalo sa mga kompanya sa lana ang price adjustment matag Lunes ug ipatuman kini matag Martes.