Gipanghimakak sa Philippine National Police (PNP) ang isyu kalabot sa pagpatuman og “loyalty check” sa kapulisan samtang nagpadayon ang impeachment trial ug uban pang nasudnong isyu.
Gipasalig ni Police Regional Office-10 Director PBGen Christopher Abrahano nga ang kapulisan magpadayon lamang sa pagsunod subay sa mando ug magpabiling matinud-anon sa gobyerno, Konstitusyon ug ilang mga superyor.
Matud ni Abrahano, nagpabiling apolitical ang PNP ug walay gipatuman nga loyalty check sa ilang mga personnel. Gipasabot usab sa opisyal nga ang mga pulis mosunod lamang sa mga mando nga subay sa balaod ug ang politika pasagdan sa mga politiko.
Subling gipasalig sa kapulisan ang kaluwasan sa mga turista sa nagkalain-laing destinasyon sa Northern Mindanao pinaagi sa padayong pagmonitor sa mga tourist police.
Matud ni Abrahano, adunay mga tourist police nga gitahasan sa pag-atiman sa seguridad sa mga tourist destination sa rehiyon.
Tumong niini nga masiguro nga luwas ug malinawon ang mga domestic ug foreign tourists nga mobisita sa Northern Mindanao.
Samtang, gihangyo ni Abrahano ang kooperasyon ug padayong suporta sa katawhan aron mas epektibong matuman sa kapulisan ang ilang buluhaton sa pagmintinar sa kalinaw ug seguridad sa rehiyon.
Gipasalamatan ni Abrahano ang komunidad sa Northern Mindanao sa ilang padayong suporta sa kapulisan.
Matud niini, mokabat sa 10 mil ang mga pulis sa rehiyon apan dili nila hingpit nga matuman ang ilang trabaho kung walay tabang ug kooperasyon gikan sa katawhan.