Gikuwestiyon ni Lanao del Sur 1st District Representative Zia Alonto Adiong ang paggamit sa confidential funds sa Office of the Vice President, ilabina ang pagbalhin sa pondo ngadto sa mga indibidwal nga giingong walay awtoridad ubos sa Joint Circular.
Matud ni Adiong, ang pipila ka kalihukan nga gipresentar sa depensa, sama sa surveillance ug security operations alang sa Vice President, gihimo na bisan wala pa ma-release ang confidential funds.
Gisulti niini nga kung i-reimburse kini gamit ang confidential funds, mahimong supak kini sa mga lagda tungod kay ang maong mga kalihukan sakop na sa regular nga trabaho sa PNP ug militar.
Gikuwestiyon usab sa mambabalaod ang pagbalhin sa confidential funds ngadto kang Colonel Nolasco ug Colonel Lachica, nga matud niini dili awtorisadong personnel nga mahimong modawat ug mogasto sa maong pondo ubos sa Joint Circular.
Dugang pa niini, bisan legal ang tinubdan sa pondo, mahimong iregular ang paggamit niini kung gipadagan pinaagi sa mga indibidwal nga walay legal nga awtoridad sa pagdumala sa confidential funds.