Nasikop sa mga kapulisan sa Malaybalay City Police Station ang usa ka 45-anyos nga lalaki human kini madakpan nga gikatahong nagbitbit og armas sa Purok 6B, Barangay Aglayan, Malaybalay City.
Base sa report, nakadawat og impormasyon ang mga pulis pasado alas-7:00 sa gabii gikan sa usa ka tinubdan nga wala gipaila ang identidad, mahitungod sa usa ka lalaki nga giingong armado ug anaa sa maong lugar.
Mitubag dayon ang mga kapulisan sa maong impormasyon ug sa ilang pag-abot, ilang nasapon ang suspek nga gikatahong nakainom ug adunay armas.
Sa dihang nakabantay sa mga pulis ang lalaki, gitago niini ang armas nga gibutang sa iyang hawak.
Gipangayo sa mga kapulisan ang mga dokumento nga makapamatuod sa legal nga pagpanag-iya niini sa armas, apan wala kini makapakita og bisan unsang papeles.
Nakuha gikan sa suspek ang usa ka Springfield Armory caliber .45 pistol, lakip ang usa ka magazine nga adunay pito ka bala. Nasuta usab sa mga pulis ang sling bag sa lalaki diin nakit-an ang usa pa ka hinagiban nga nailhang “lugud.”
Ang suspek ug ang mga nakumpiskang armas ug uban pang ebidensya gidala ngadto sa Malaybalay City Police Station alang sa hustong proseso ug disposisyon.