Gidawat sa National Confederation of Transport Workers Union (NCTU) ang ipatuman nga ₱12 kada litro nga fuel discount alang sa mga public utility jeepney (PUJ), nga giila nilang dakong kahupayan alang sa mga drayber ug operador taliwala sa pag-usab-usab sa presyo sa lana.
Gipahayag ni NCTU Regional Coordinator Joel Gabatan nga igo ug paborable na ang ₱12 nga discount gikan sa ilang orihinal nga gipangayo nga ₱10 hangtod ₱15. Gitumbok niini nga mas sayon ug efficient ang maong sistema kumpara sa milabay nga fuel subsidy tungod kay awtomatiko kining madawat sa mga kwalipikadong PUJ nga adunay balidong OR/CR nga dili na kinahanglang magparehistro pag-usab sa Land Transportation Franchising and Regulatory Board (LTFRB).
Dugang pa, gipadayon sa grupo ang pagsuporta sa ₱2 nga minimum fare increase aron mahimong ₱15 ang pletehan, nga makatabang sa adlaw-adlaw nga kita ug makasulbad usab sa problema sa pagsinsilyo. Taliwala sa planong transport holiday sa ubang grupong nagprotesta, gitin-aw sa NCTU nga dili sila moapil sa welga tungod kay giisip nilang makatarunganon na ang gihatag nga discount ug gisugyot nga pletehan.
Gipahimug-atan usab sa grupo nga ang maong discount magamit lamang sa mga rehistradong PUJ, uban ang paglaom nga magpadayon ang suporta sa gobyerno aron mabalanse ang panginahanglan sa sektor sa transportasyon ug sa mga pasahero.