Nadakpan sa mga awtoridad ang usa ka armadong lalaki nga namatikdan nga nagpaniid ug nagrekord sa golf course ni US President Donald Trump sa Rancho Palos Verdes, Los Angeles, duha ka adlaw sa wala pa ang nakatakdang pagbisita sa lider.
Giila ang suspek nga si Jeanine John Taele, 38-anyos ug residente sa Downey, California. Gisikop si Taele sa Los Angeles County Sheriff’s Department ug pederal nga mga sakop human namatikdan nga nagkuha og mga litrato ug bidyo sa mga security preparation sa maong lugar.
Nakuha gikan sa sakyanan sa suspek ang usa ka kargadong pistola ug magazine nga adunay mga bala. Sa gipahigayong pagrekisa sa iyang balay, nakaplagan usab sa kapulisan ang usa ka AR-style rifle, body armor, dugang nga mga bala, ug mga notebook nga adunay sulod nga makabalaka nga mga pahayag.
Nag-atubang na sa mga kasong iligal nga paghupot og armas ang suspek, samtang nagpadayon ang imbestigasyon sa FBI ug US Secret Service aron masuta ang tinuod nga motibo sa maong pagpaniid.