Mihuyang sa 6.2% ang inflation rate o kinatibuk-ang pagsaka sa presyo sa mga produkto ug serbisyo sa Pilipinas niadtong Hulyo 2026, sumala sa Philippine Statistics Authority (PSA).
Matud sa PSA, ang paghinay sa inflation tungod sa ubos nga pagsaka sa gasto sa sektor sa transportasyon, diin ang transport index mikunhod ngadto sa 11.9% niadtong Hulyo gikan sa 12.8% niadtong Hunyo.
Nakatampo usab sa paghinay sa inflation ang mas ubos nga pagsaka sa gasto sa education services, restaurants, ug accommodation services. Samtang, nagpabiling 5.3% ang food inflation niadtong Hulyo.
Nakatabang usab ang padayon nga pag-ayo sa suplay sa bugas nga mipahinay sa presyo niini bisan pa sa hulga sa El Niño.
Bisan og mikunhod gikan sa 6.4% niadtong Hunyo, mas taas gihapon ang inflation tandi sa target sa gobyerno nga 2% hangtod 4%.
Sumala pa sa PSA, nakaapekto usab sa paghinay sa inflation ang mga lakang sa Bangko Sentral ng Pilipinas pinaagi sa pagpataas sa interest rates aron makontrol ang pagsaka sa presyo sa mga palaliton.