Usa ka talagsaong abilidad ang gipakita sa usa ka 21 anyos nga Amerikano human nasulbad ang 3x3x3 Rubik’s Cube sulod sa 11.56 segundos bisan pa og naka-blindfold.
Pinaagi sa maong nahimo niadtong Hunyo 28, nabawi ni Tommy Cherry ang Guinness World Record alang sa “fastest time to solve a 3x3x3 rotating puzzle cube while blindfolded.”
Dili kini ang unang higayon nga nakab-ot niya ang maong titulo. Una na kining nakuha niadtong Agosto 5, 2021 sa Florida pinaagi sa oras nga 15.27 segundos, ug sukad niadto padayon niyang gipauswag ang iyang kaugalingong rekord.
Nakat-on si Tommy sa pagsulbad sa Rubik’s Cube niadtong 2015 sa edad nga 11 ug usa ka bulan lang ang milabay misalmot dayon kini sa iyang unang kompetisyon.
Pinaagi sa mga tutorial sa YouTube, nakat-on usab siya sa pagsulbad niini samtang naka-blindfold.
Kung walay blindfold, kaya niyang masulbad ang cube sulod sa mga pito ka segundos, samtang ang iyang labing paspas nga oras sa kompetisyon mao ang 4.53 segundos.