Nagpabiling dakong hagit ang pagbatok sa problema sa ilegal nga droga sa nasud tungod sa padayon nga operasyon sa mga dagkong sindikato nga naggamit og nagkadaiyang pamaagi sa pagpasulod ug pag-apod-apod niini.
Matud sa Philippine Drug Enforcement Agency (PDEA) nga dili dali masulbad ang maong isyu taliwala sa paningkamot sa gobyerno.
Sa gipahigayon nga Training of Trainers on Drug Abuse Prevention Education kagahapong adlawa, gibutyag ni PDEA Region 10 Regional Director Alex Tablate nga ang negosyo sa ilegal nga droga dugay na nga naglungtad sa Pilipinas.
Dugang pa ni Tablate, aduna usab mga negosyante nga nagtagtag og mga dagkong legal nga negosyo sa nasud, lakip na ang pabalat-kayo nga mga manufacturing companies, nga sa pikas bahin naglihok ug nagmanufacture usab og mga ilegal nga droga.
Nunot niini, gikabalak-an sa PDEA Bukidnon ang dakong epekto niini sa umaabot nga airport sa Don Carlos sa paglihok sa mga drug syndicates. Sumala ni Rodolfo Dela Cerna, ang provincial director sa PDEA Bukidnon nga mahimong mas sayon ug mas paspas ang pagdala sa ilegal nga droga pinaagi sa eroplano kung magsugod na ang operasyon sa airport.
Taliwala sa pagsaka sa kaso sa ilegal nga droga, gipasalig sa ahensya nga hugot ang pagmonitor ug pagpahigayon og mga operasyon batok sa maong ilegal nga kalihukan.