Gidahom nga rollback sa presyo sa lana sunod semana posibleng mapapas tungod sa tensyon sa Middle East

Posibleng mapapas ang gidahom nga rollback sa presyo sa petrolyo sa sunod semana human mibalik ang tensyon ug panagbayloay og pag-atake tali sa Iran ug Estados Unidos.

Sumala ni Jetti Petroleum President Leo Bellas, adunay untay gidahom nga pagpaubos sa presyo base sa unang pipila ka adlaw nga trading sa Mean of Platts Singapore (MOPS) tungod sa temporaryong paghupay sa away.

Apan tungod sa bag-ong pag-atake sa Iran sa mga base sa US ug sa gihimong pagbalos sa militar sa Amerika, misaka na usab ang presyo sa crude oil sa kalibutanong merkado.

Tungod niini, nagpahimangno si Bellas nga gawas sa pagkawala sa gidahom nga rollback, adunay dako usab nga tsansa nga mapulihan kini og price hike o pagsaka sa presyo sa mga gasolinahan sa sunod semana.