Nasikop sa gipahigayong joint buy-bust operation sa kapulisan ug PDEA-10 ang duha ka lalaking drug personalities sa Purok 4B, Barangay Aglayan, Malaybalay City niadtong Martes sa gabi-i, Hulyo 21.
Giila ang mga suspek nga nag-edad og 27 ug 28 anyos nga parehong gikonsidera nga Street Level Individuals (SLI). Nabuhat ang operasyon pinaagi sa pagtinabangay sa Malaybalay City Police Station, Bukidnon PPO, ug PDEA Region 10 pasado alas-8:53 sa gabi-i.
Nasakmit gikan sa mga suspek ang tulo ka sachet sa gituohang shabu nga nagtimbang og 4.074 grams ug nagkantidad og ₱27,703, kauban ang usa ka asul nga container ug ₱500 nga buy-bust money.
Sa kasamtangan, gitingkagol na sa Malaybalay City Police Station ang duha samtang giandam na ang ipasaka nga kasong paglapas sa Sections 5 ug 11 sa Republic Act 9165 o Comprehensive Dangerous Drugs Act of 2002.