Laumang mosaka ang minimum nga presyo sa pagpalit sa National Food Authority (NFA) sa humay ngadto sa P21 matag kilo sugod sa umaabot nga ting-ani sa Septyembre.
Gipahibalo ni Agriculture Secretary Francisco Tiu Laurel Jr. nga gikan sa kasamtangang P17 matag kilo, himuon na kining P21 aron matabangan ang mga mag-uuma nga makabsan ang nagkataas nga gasto sa abono ug uban pang panginahanglanon sa pagpanguma.
Samtang, temporaryo usab nga dili tugotan ang pagdiskarga sa imported nga bugas sa mga pantalan sa Iloilo gikan sa tunga-tunga sa Septyembre hangtod sa katapusan sa Nobyembre, aron dili maapektuhan ang presyo sa lokal nga humay atol sa panahon sa ting-ani.
Sumala sa DA, ang maong mga lakang gilauman nga mopadayon sa maayong farmgate price ug makahatag og mas taas nga kita sa mga mag-uuma, samtang gipalig-on usab ang suplay sa bugas sa nasud.