Hulaton una sa House prosecution panel ang desisyon sa Senate impeachment court bahin sa pagpagawas sa Bureau of Internal Revenue (BIR) records ni Vice President Sara Duterte.
Matud ni House prosecutor Representative Terry Ridon, adunay gahum ang impeachment court sa pag-isyu og subpoena aron makuha ang mga dokumento, apan kon kinahanglanon ang pag-apruba ni Pangulong Ferdinand Marcos Jr., motuman sila sa maong proseso.
Gipasabot usab sa House prosecution nga ang ilang tumong dili ang paghimo og drama, kondili ang paglatid sa tanang ebidensya aron adunay lig-on nga basihan ang mga senator-judges sa ilang desisyon.
Sumala usab ni Representative Ace Barbers nga ang pagpangayo sa BIR records, bank records, ug AMLC reports dili nagpasabot nga sad-an na ang bise presidente, kundili kabahin lamang kini sa proseso sa pagsusi sa mga ebidensya aron mapadayag ang kamatuoran.
Dugang pa sa House prosecution panel nga ebidensya ug paspas nga resolusyon sa impeachment trial batok kang Vice President Sara Duterte ang ilang prayoridad, dili ang paghimo og drama.
Matud ni House prosecutor Representative Terry Ridon, nakatutok ang prosecution sa pagpresentar sa mga ebidensya aron makadesisyon dayon ang mga senator-judges sa kaso.