Gipamugos sa militar nga nagpabilin silang nakatutok sa tinuod nga misyon sa seguridad—ilabi na sa pagdeklara sa Bukidnon nga hingpit nang limpyo sa insurhensya ug sa pagpangandam alang sa territorial defense—taliwala sa nagpadayong impeachment trial ug mga saway sa giingong “huyang nga liderato” sa administrasyon.
Atol sa ika-53 nga anibersaryo sa 403rd Infantry Brigade sa Malaybalay City, gihayag ni Philippine Army Commanding General Lieutenant General Antonio Nafarrete nga tungod kay hapit na masulbad ang insurhensya sa nasod, ang focus sa militar mao na ang external defense o pagpanalipod sa teritoryo batok sa hulga sa gawas. Hingpit usab nga gipanghimakak ni Nafarrete ang mga hungihong bahin sa destabilization plot ug loyalty check, ug gipaniguro nga nagpabiling propesyonal ug solido ang kasundalohan.
Gipaluyohan usab kini ni 403rd Brigade Commander Brigadier General Seigfred Tubalado kinsa mibutyag nga ubos na lang sa napulo (less than 10) ka rebelde ang nahibilin sa kabukiran sa Bukidnon. Gitino ni Tubalado nga bisan wala silay namonitor nga aktibong recruitment sa pagkakaron, padayon gihapon silang nag-monitor sa mga urban areas ug social media aron mapugngan ang bisan unsang pagsulay sa mga rebelde nga mo-evolve online.