Gipanghimakak sa Philippine Army ang mga hungihong nga duna’y planong destabilization plot o gipahigayong loyalty check sa militar taliwala sa mga pagsaway sa giingong “luya nga pamunuan” ni Presidente Ferdinand “Bongbong” Marcos Jr. ug sa nagpadayong impeachment trial ni Bise Presidente Sara Duterte.
Kini ang gihayag ni Philippine Army Commanding General Lieutenant General Antonio Nafarrete atol sa ika-53 nga anibersaryo sa 403rd Infantry “Peacemaker” Brigade sa Malaybalay City niadtong Miyerkules, Hulyo 16. Gibarugan ni Nafarrete nga walay kamatuoran ang maong mga sitsit ug nagpabiling propesyonal ug apolitical o walay gidapigang partido sa pulitika ang tibuok kasundalohan bisan pa man sa init nga sitwasyon sa nasod.
Gipaluyohan usab kini ni 403rd Brigade Commander Brigadier General Seigfred Tubalado kinsa nagkanayon nga dili na kinahanglan ang loyalty check tungod kay natural nga loyal ang mga sundalo sa konstitusyon. Matud ni Tubalado, ang kasamtangang kaguliyang sa pulitika ug isyu sa liderato normal lamang nga proseso sa panggobiyerno ug malaumon kini nga molurang ra ang tensiyon sa umaabot nga mga adlaw samtang nagpabiling solido ug nagkahiusa ang Armed Forces of the Philippines (AFP).