Gipunting ni Senator-judge Robin Padilla nga si kanhi Presidente Rodrigo Roa Duterte ang ikaduhang pangulo sa nasud nga nakigbatok sa komunista, sunod kang kanhi Presidente Ferdinand Marcos Sr. atol sa iyang pagpangutana kang National Bureau of Investigation o NBI Regional Director Atty. Jeremy Lotoc sa ikalimang adlaw sa Impeachment Trial ni VP Sara.
Gipadayag ni Senator-judge Robin Padilla ang iyang paghubad sa kontrobersiyal nga Operation Romanov.
Matud ni Padilla nga ang Romanov dynasty sa Russia gipamatay sa mga komunista , ug ang paghisgot sa “Romanov” angay tan-awon isip pasidaan sa mga pamilya sa mga lider nga misukol batok sa komunismo.
Dugang niya, si Davao City Mayor Sebastian “Baste” Duterte ang unang migamit sa terminong Romanov isip pasidaan batok sa pamilyang Marcos, nga gisubli usab ni Vice President Sara Duterte sa iyang online press conference.
Apan, wala modawat si Lotoc sa interpretasyon ni Padilla ug miingon nga ang imbestigasyon may kalabotan sa gitawag nga Operation Romanov sakop sa Intelligence Service sa NBI ug ang ilang direktor ang mas angay motubag niini.