Usa ka 14-anyos nga dalagita ang namatay human natuklaw sa usa ka king cobra, nga nailhan sa dapit nga “banakon,” aron lang maprotektahan ang iyang tulo ka gagmayng mga ig-agaw sa sapa sa Barangay Batian, Maitum, Sarangani, niadtong Lunes, Hulyo 13, 2026.
Sumala sa taho, paingon matud pa maligo sa sapa ang biktima uban sa iyang mga ig-agaw sa dihang kalit nga nitungha ang bitin ug misulay sa pag-atake sa mga bata. Agi og dinalian nga taming, gigakos ug gisalipdan sa dalagita ang mga bata gamit ang iyang kaugalingong lawas, hinungdan nga siya ang naigo ug natuklaw sa likod nga bahin.
Bisan pa man sa iyang samad, nakahimo pa sa pag-uli sa balay ang biktima aron magpahibalo sa nahitabo.
Gidala gilayon kini sa iyang pamilya sa labing duol nga tambalanan, apan gideklara na kini nga dead on arrival tungod sa kakusog sa hilo.
Ang lokal nga kagamhanan sa Maitum mihatag na og hinabang sa pamilya sa biktima ug nagpahinumdom sa publiko nga bantayan pag-ayo ang mga bata aron malikayan ang susamang trahedya.