Imbes nga “passion fruit” ang makuha, usa ka critically endangered nga Philippine Eagle ang milagrosong nasalbar sa residente nga si Marven Linoy duol sa Sawaga River, Barangay Dalwangan, Malaybalay City niadtong Hulyo 3, 2026. Nakadungog si Linoy og saba nga sapa-sapa sa lasang ug sa iyang pagsusi, nakita niya ang kapin 30 ka mga unggoy nga nagtabang ug nag-atake sa maong langgam diha sa yuta. Tungod kay wala siya’y bitbit nga bisan unsang kagamitan, nagrambol si Linoy pinaagi sa pag-paghot sama sa usa ka iro hinungdan nga nangaratol ug nanglayas ang mga unggoy.
Luya, nagkurog, ug puno sa lapok ang maong agila hinungdan nga gitabonan kini ni Linoy og mga dahon sa Anunutong ug iyang kaugalingong jacket aron mamenosan ang stress niini samtang naghulat og tabang. Pinaagi sa dinalian nga koordinasyon sa Inhandig Tribal Multi-Purpose Cooperative (ITMPC), Barangay Kapitan Royville Gabucan Pasco, ug sa DENR, malampuson nga na-rescue ang agila nga opisyal karong gipangalanan nga “Sawaga-Dalwangan.”
Sa dihang gidala ang agila sa Davao City alang sa lawom nga pag-atiman sa mga eksperto sa Philippine Eagle Foundation (PEF), nakurat ang mga beterinaryo human masuta sa X-ray nga duna diay kini duha ka pellets o bala sa sulod sa iyang lawas — usa duol sa tuong pako ug usa sa wala nga paa. Nakitaan usab kini og mga pali sa tiil nga timailhan nga posibleng gigapos kini kaniadto, gawas pa sa mga ulod o maggots nga nakuha sa iyang mga samad sa pako ug ikog tungod sa pipila ka adlaw nga pagkahigda sa yuta.
Tungod sa maong mga diskubrehan, nanawagan karon si Merly Omarol Suday sa publiko nga hunongon ang pagbato og walay basehan nga akusasyon batok sa mga lumad nga residente nga maoy tinuod nga nakakita ug miluwas sa agila. Gipahayag ni Suday nga kon dauton ug dinalian nga tratuhon isip suspetsado ang mga wildlife rescuers, posibleng mawad-an na og kadasig ang mga tawo sa pag-report ug pagluwas sa mga samarang mananap sa umaabot. Kasamtangan nga gipaubos sa intensive care ang agila sa Mount Kitanglad Range, diin gihangyo usab sa PEF ang usa ka pormal nga imbestigasyon sa gidangatan niini.