Miabot na sa usa ka bilyon ang kinatibuk-ang ihap sa mga bisita nga nakasulod sa Disneyland Resort sa Anaheim, California, dul-an sa 70 ka tuig sukad kini giablihan ni Walt Disney niadtong 1955.
Isip pagpasidungog sa maong makasaysayang kalampusan, gipili ang 11-anyos nga si Andres Robles gikan sa Arizona uban sa iyang mga ginikanan nga sila Alejandra ug Jose isip honorary billionth guests sa bantugang theme park.
Sumala sa Disney Parks Blog, mibisita ang pamilyang Robles sa Disneyland isip kabahin sa selebrasyon sa adlawng natawhan ni Andres.
Gitambongan usab nila ang seremonya sa pagbutyag sa bag-ong karatula nga nagpakita nga miabot na sa 1,000,000,000 ang kinatibuk-ang ihap sa mga bisita sa Disneyland.
Mitambong usab sa maong okasyon ang mga inilang karakter sa Disney nga sila Mickey Mouse, Minnie Mouse, Donald Duck, ug Daisy Duck.
Gawas niini, gihatagan ang pamilya og VIP guided tour sa Disneyland, lakip ang pagbisita sa pribadong apartment ni Walt Disney ug eksklusibong preview sa bag-ong atraksyon nga “Soarin’ Across America.”
Giila ang Disneyland isip kauna-unahang Disney theme park sa kalibotan ug usa sa mga nakatampo sa pag-uswag sa industriya sa mga theme park sa Estados Unidos.
Sa pagkakaron, adunay na usab mga Disney parks sa nagkalain-laing bahin sa kalibotan, lakip ang Orlando, Paris, ug Tokyo.