Nagtuo ang batikang abogado nga si Atty. Jojo Lacanilao nga posibleng mapugos si Bise Presidente Sara Duterte sa pagtambong sa pipila ka pagdungog aron personal nga motubag sa mga kontrobersyal nga isyu nga nalakip sa impeachment complaint batok kaniya.
Matud ni Lacanilao, bisan og igo na ang presensya sa iyang mga abogado o representante sa korte, adunay mga higayon nga mas klaro nga mapasabot mismo ni VP Sara ang konteksto sa mga alegasyong gilambigit kaniya.
Lakip sa mga isyu nga mahimo niyang tubagon mao ang iyang tax records ug financial capacity, lakip usab ang sa iyang pamilya.
Sumala pa sa abogado, mahimong ipatawag si Duterte aron ipatin-aw ang giingong kalainan tali sa iyang tax records ug sa iyang aktuwal nga bahandi, lakip ang mga bank transactions nga miabot sa bilyon ka piso, base sa mga dokumentong una nang gipresentar sa House Justice Committee hearings.
Dugang pa ni Lacanilao nga mas masabtan sa publiko ang maong mga isyu kon ang Bise Presidente mismo ang mohatag sa iyang katin-awan.
Apan, gipatin-aw niya nga ang pag-tambong ni VP Sara magdepende gihapon sa mga argumento ug ebidensyang ipresentar sa House prosecution panel, tungod kay kini maoy basihan sa impeachment court sa paghimo sa iyang desisyon.
Nagtuo usab si Lacanilao nga sa ulahi ipasubpoena sa House panel ang kontrobersyal nga green box nga naglangkob sa tax records ni VP Sara, bisan pa man og kini nabalik na sa Bureau of Internal Revenue (BIR).
Matud sa abogado, nga kaniadto nahimong spokesperson ni kanhi Chief Justice Maria Lourdes Sereno atol sa iyang impeachment proceedings, gipabalik ang green box tungod kay wala kini sa legal nga kustodiya o custodia legis sa impeachment court.