Gipanghimakak sa grupong Kabataan Partylist-Southern Mindanao ang baruganan nga nagpabiling “Solid Duterte” ang Davao Region ug ang tibuok isla sa Mindanao taliwala sa nagpadayong impeachment trial batok kang Vice President Sara Duterte.
Sa pakighinabi sa Bombo Radyo kang Chairperson Cobbie Jan Cand, gibutyag niini nga dili tinuod ang maong naratibo tungod kay sa mismong Davao City, duna na’y nagkadaiyang progresibong grupo ug sektor ang nagpahigayon og mga kilos-protesta nga nanawagan sa conviction sa Bise Presidente.
Gidugang pa ni Cand nga makita usab ang kamatuoran sa maong hisgutanan pinaagi sa pagboto sa kadaghanan sa mga kongresista gikan sa Mindanao pabor sa impeachment sa Bise Presidente, nga nagpakita nga dili na hingpit nga kontrolado sa usa ka pamilya ang rehiyon.
Gawas niini, gihutdan usab og basehan sa grupo ang pamahayag ni VP Sara nga “bloodied but unbowed.” Matud sa youth leader, ang tinuod nga dugoan mao ang mga Lumad nga gipasirad-an og tunghaan sa Davao niadtong mayor pa kini, ang mga biktima sa war on drugs sa iyang amahan, ug ang mga estudyante nga naapektuhan sa krisis sa edukasyon sa panahon nga siya pa ang namuno sa DepEd.