Nangandam na ang mga nasod sa Taiwan, China, ug Japan sa nagpadulong nga pagsalanta sa Typhoon Inday (nga adunay international name nga Bavi) nga gilaumang magdala og grabe nga mga pag-ulan ug kusog nga hangin sa maong rehiyon.
Sumala sa mga weather authorities sa Taiwan, posible nga magbuhos ang bagyo og hangtod sa usa ka metro nga ulan sa pipila ka mga dapit. Tungod niini, kapin sa 29,000 ka mga sundalo ang gipakatap ug naka-standby na karon aron daling makatabang sa ipahigayon nga rescue ug relief operations. Base sa kalapad sa maong bagyo, gilauman nga kini na ang mahimong pinakadakong bagyo nga moigo sa Taiwan sukad pa niadtong tuig 1987.
Gawas sa Taiwan, nagpagawas na sab og pasidaan ang mga awtoridad sa China dapit sa lalawigan sa Fujian, ingon man ang Japan dapit sa ilang Sakishima Islands. Sa kasamtangan, nagsugod na sab og kaapektar ang liboan ka mga pasahero human gikansela sa mga dagkong kompanya sa eroplano—sama sa Japan Airlines ug All Nippon Airways—ang ilang mga biyahe tungod sa hulga sa dautang dagan sa panahon.