Misaka na sa 57,316 ka pamilya ang natala nga naapektuhan sa Bagyong Inday ug sa gipakusgan pa kini sa Habagat.
Katugbang kini sa kapin 248,000 ka indibidwal gikan sa 161 ka barangay sa nagkalain-laing bahin sa nasud.
Sa pagkakaron, kapin 6,400 ka mga indibidwal o mokabat sa 1,900 ka pamilya ang nagpabilin sa mga evacuation center.
Giablihan usab sa gobyerno ang kapin 40 ka evacuation centers aron masilungan ang mga residente nga naapektuhan sa pagbaha ug padayon nga kusog nga pag-ulan.
Gilauman nga mosaka pa ang maong ihap samtang nagpadayon ang assessment ug validation sa Department of Social Welfare and Development (DSWD) ug sa National Disaster Risk Reduction and Management Council (NDRRMC) sa mga apektadong lugar ug residente.
Lakip sa mga rehiyong grabeng naapektuhan ang Cagayan Valley, Cordillera, Ilocos Region, Central Luzon, Western Visayas, Negros Island Region, Zamboanga Peninsula, Northern Mindanao, Davao Region, SOCCSKSARGEN, ug BARMM.