Padayon gihapon ang termination process sa kontrata tali sa Malaybalay City Water District (MCWD) ug PrimeWater, luyo sa kalit nga pagbaligya niini ngadto sa laing kompanya nga mibilin og milyon-milyong pesos nga utang ug obligasyon.
Gibutyag ni MCWD General Manager Engr. Nolito Binahon sa eksklusibong pakighinabi sa Bombo Radyo, nga hingpit nang gipalit sa Crystal Bridges Holdings (ubos sa magpapatigayon nga si Lucio Co) ang PrimeWater gikan sa Villar Group ug giilisan ang ngalan ngadto sa Heraya Water Corporation. Giklaro ni Binahon nga gihimo ang takeover nga walay una’ng konsultasyon sa ilang buhatan, apan padayon gihapon ang ilang lakang sa pagtapos sa kontrata tungod sa nagpabiling material breaches o kapakyasan sa maayong serbisyo sa tubig.
Lakip sa mga bug-at nga obligasyon nga gibilin sa PrimeWater mao ang ₱4 hangtod ₱5 milyon nga kolektahonon sa MCWD, ug dul-an ₱10 milyon nga utang sa mga gi-arkilahang water delivery tankers ug mga local suppliers. Tungod niini, itunol sa MCWD ang maong isyu ngadto sa Office of the Government Corporate Counsel (OGCC) aron sutaon ang legal nga implikasyon ug kung angay ba nilang irekonisa ang bag-ong pamunoan.