Laing bug-at nga palas-anon sa bulsa ang atubangon sa mga konsumidor human gipahibalo ang gilaumang pagsaka sa presyo sa petrolyo, cooking gas kun LPG, ug ang singil sa kuryente gikan sa spot market karong bulana.
Base sa unang tulo ka adlaw nga trading sa merkado sa kalibutan, gilauman nga mosaka og ₱1.50 matag litro ang diesel ug ₱1.05 matag litro ang kerosene. Bisan pa man og nakatala og ₱0.80 nga usos sa gasolina, nagpabili gihapon ang kabalaka nga mosaka pa kini human gideklara ni US President Donald Trump nga natapos na ang ceasefire sa Iran, butang nga dako og epekto sa presyo sa aseite sa kalibutan. Samtang, gipahibalo usab ni Regasco President Arnel Ty nga mosaka og ₱3.00 matag kilo ang presyo sa LPG sugod karong Lunes, Hulyo 13, tungod sa pagbalik sa excise tax ug sa pagsaka sa contract price niini sa internasyonal nga merkado.
Dugang pasakit usab sa mga konsumidor ang report sa Independent Electricity Market Operator of the Philippines (IEMOP) diin misaka ang presyo sa kuryente sa spot market niadtong Hunyo, nga makita na sa billing karong Hulyo. Ang maong pagsaka natala sa ₱0.93 matag kilowatt-hour sa Luzon, ₱3.48 sa Mindanao, ug ang labing dako mao ang Visayas nga niabot sa ₱4.25 matag kilowatt-hour tungod kay dako ang ginasaligan nga suplay sa ilang mga electric cooperative gikan sa spot market.