Sa ikatulong adlaw sa impeachment trial ni Vice President Sara Duterte, gipakita sa depensa ang video sa emosyonal nga press conference ni kanhi OVP Chief of Staff Atty. Zuleika Lopez niadtong Nobyembre 23, 2024.
Gigamit kini ni Defense Counsel Atty. Carlo Narvasa aron kuwestiyonon ang katukma ug kredibilidad sa open source investigation ug transcript nga gihimo ni NBI Senior Agent John Mar Calilung.
Samtang nagpadayon ang cross-examination, gipasabot usab sa depensa nga ang kontrobersiyal nga pamahayag ni Vice President Sara Duterte bahin sa giingong “kill order” resulta lamang sa emosyon ug kabalaka sa nahitabo kang Lopez, ug dili angay hubaron isip tinuod nga hulga sa pagpatay.
Mipalag niini ang prosecution pinaagi ni Private Prosecutor Amando Virgil Ligutan, nga miingon nga walay kalabutan ang pangutana sa depensa tungod kay gamay ra o “minuscule” ang kalainan sa pipila ka pulong sa transcript.