Plano sa House Prosecution Panel nga ipa-subpoena si Vice President Sara Duterte aron pugson siyang motestigo sa presentasyon sa ebidensiya alang sa impeachment article nga may kalabotan sa alegasyon sa grave threats, sumala kang counsel for the prosecutors nga si Atty. Lorna Kapunan.
Matud sa abogado nga tumong sa prosekusyon ang pagsumite og request alang sa subpoena sulod sa 11 ka trial days nga gitakda para sa presentasyon sa ebidensiya sa Article 4 sa impeachment.
Matod pa ni Atty. Kapunan, ang maong hangyo isumite sa Martes, subay sa mga pamaagi sa korte, ug ubanan kini og legal memoranda gikan sa depensa ug sa prosekusyon.
Dugang usab niini nga si Trial Presiding Officer Francis Escudero mipahibalo sa prosekusyon nga iyang desisyunan ang maong hangyo sa higayon nga pormal na silang makapasa og written motion.
Sa laing bahin, gipadayag ni prosecution legal spokesperson Atty. Benjamin Tolosa nga kon ipatawag ang bise presidente aron motestigo, posible nga ang iyang testimonya dili lamang kutob sa isyu sa grave threats, kondili mahimong moabot usab sa ubang mga artikulo sa impeachment.