MARAMAG, BUKIDNON — Hugot nga gibarugan sa Central Mindanao University (CMU) ang ilang katungod sa kinatibuk-ang 155 ka hektaryang yuta sa lungsod sa Maramag human paboran sa korte ang ilang gipasakang kasong forcible entry batok sa mga misulod nga grupo nga Buffalo-Tamaraw-Limus (BTL).
Atol sa gipahigayon nga press conference, gipahayag ni CMU President Dr. Rolito Eballe nga malampuson nilang nabawi ug gipailawom na sa pagtikad ang Beef Cattle ug Green Valley areas pinaagi sa gi-isyu sa korte nga writ of demolition batok sa mga ilegal nga istruktura nga gipangtukod sa maong dapit. Nahimong kontrobersyal ang maong isyu human nga ginasulayan sa pag-okupar sa maong grupo ang luna sa unibersidad.
Giklaro ni Atty. Jeoffrey Sayson, ang private legal counsel sa CMU, nga ang gihimo nga pagsulod sa maong grupo gamit ang giingong validation assessment sa DAR walay legal nga awtoridad ug lig-on nga basehan. Subay sa mga nangaging desisyon sa Korte Suprema, ang tibuok 3,080 ka hektaryang reservation sa eskwelahan nagpabilin isip property of public dominion alang sa edukasyon ug panukiduki, hinungdan nga dili kini pwede ipailawom sa Comprehensive Agrarian Reform Program (CARP).