BSP, malaumon nga mas daghang bangko ang magpaubos sa transfer fees

Gilauman sa Bangko Sentral ng Pilipinas (BSP) nga mas daghan pang mga bangko ang mosunod sa pagwagtang o pagkunhod sa bayranan sa fund transfers ngadto sa ubang bangko ug e-wallets aron mapalapad ang paggamit sa digital payments sa nasud.

Sumala ni BSP Governor Eli Remolona Jr., posible nga sulod sa pipila ka adlaw adunay dugang nga financial institutions nga mopatuman sa maong lakang, sunod sa desisyon sa BPI ug RCBC nga wagtangon ang InstaPay ug PESONet transfer fees pinaagi sa ilang digital platforms.

Matod ni Remolona, ang pagkunhod o pagwagtang sa transfer fees maghatag og mas daghang kapilian sa mga konsumidor ug makadasig sa mas daghang Pilipino nga mogamit sa digital payment system.