Usa ka talagsaong dungog ang nakuha ni Tommy Schmidt, usa ka 45-anyos nga residente sa Germany, human niini nabuak ang Guinness World Record alang sa kinadak-ang “Lego brick sausage.”
Ang maong higanteng bratwurst nga kompleto sa bun ug mustard gilangkuban sa 65,000 ka Lego bricks ug adunay gitas-on nga 6 feet ug 6.7 inches.
Gipahayag ni Schmidt nga ang inspirasyon niini naggikan sa sikat nga sausage producer nga “Die Thüringer,” isip pasidungog sa iyang rehiyon sa Thuringia diin ilado ang maong putahe sa tibuok kalibutan.
Ang tibuok proseso miabot og kapin sa usa ka tuig, diin unom ka bulan niini ang gigahin sa mismong pag-assemble.
Tungod sa kadako ug gibug-aton sa maong istruktura, giangkon ni Schmidt nga milihok sila isip usa ka grupo aron masiguro nga maampingan ug masulod kini sa pultahan sa ilang patio sa wala pa kini malampusong nadala ug nadispley sa headquarters sa Die Thüringer.