Misaka na sa 2,025 ang mga excess deaths sa France tungod sa grabeng heatwave sa Europa sukad sa katapusang semana sa Hunyo, sumala sa mga public health officials sa maong nasud.
Nasayran nga 30 porsiyento kini nga mas taas kumpara sa miaging semana. Matod ni French Health Minister Stéphanie Rist, namatikdan ang pagsaka sa ihap sa mga namatay, ilabina sa mga adunay 45 anyos pataas.
Niadtong Hunyo 24, natala sa France ang labing init nga adlaw sa kasaysayan sa nasod, diin miabot sa hapit 41 degrees Celsius ang temperatura sa Paris.
Gilauman usab nga mosaka pag-usab sa 40 degrees Celsius ang temperatura sa habagatang bahin sa nasod, samtang nagpadayon ang red heat alert ug hulga sa mga sunog sa kalasangan.
Kapin 7,000 ka sunog na ang natala sukad pagsugod sa ting-init, nga mitupok sa dul-an 8,700 ka ektarya sa yuta ug mipugos sa pag-evacuate sa liboan ka residente.
Naapektuhan usab ang ubang nasod sa Europa. Miabot sa 1,222 ka excess deaths ang natala sa Belgium, samtang gibanabanaang 480 ka excess deaths usab ang naitala sa Netherlands, kadaghanan mga tigulang.
Sumala sa Copernicus Climate Change Service, ang Europa mao ang pinakapaspas mo-init nga kontinente sa kalibotan, hinungdan sa mas kanunay nga heatwave, kakulang sa tubig, ug wildfire.