Gikuwestiyon ni kanhing Kongresista Mike Defensor ang pagsang-at sa kasong plunder batok kang Senador Rodante Marcoleta sa Sandiganbayan, nga matud niya ang nadawat sa senador mga donasyon lamang sa kampanya ug wala maglakip og pondo sa gobyerno.
Matud ni Defensor, walay kuwarta nga gikawat gikan sa kaban sa nasud ug walay pabor nga gipangayo o gihatag isip balos sa maong donasyon, busa wala siyay nakita nga basihan aron ikonsidera kini nga plunder.
Dugang pa ni Defensor, kon gamiton ang campaign donations isip basehan sa kasong plunder, kinahanglan nga patas usab ang pagpatuman niini sa tanan.
Gipunting niini nga nakahatag usab og dagkong donasyon sa kampanya ni Presidente Ferdinand Marcos Jr. sila Special Assistant to the President Anton Lagdameo, PCSO General Manager Mel Robles, ug Department of Agriculture Secretary Francisco Tiu Laurel Jr., nga karon naglingkod na sa hataas nga mga posisyon sa gobyerno.
Gipatin-aw ni Defensor nga wala niya giingong ilegal ang maong mga donasyon, apan kinahanglan nga parehas ang sukdanan sa imbestigasyon aron malikayan ang giingong selective justice.