Nakumpiska sa Police Regional Office-10 ang gibanabanaang P1.4 milyon nga kantidad sa gituohang smuggled cigarettes atol sa duha ka sunod-sunod nga anti-smuggling operations sa Kalilangan, Bukidnon niadtong Hunyo 30.
Sa unang operasyon, mitubag ang mga otoridad sa usa ka vehicular accident sa Sitio Forchacu IV, Barangay Malinao, diin ilang nakit-an ang gibiyaan nga Mitsubishi Strada ug 300 ka reams sa Red Modern cigarettes nga nagkantidad og P240,000, lakip ang ubang kontrabando nga gitago sa secret compartment sa sakyanan.
Sa ikaduhang operasyon sa Regional Border Control Point sa Barangay Pamotolon, nadakpan ang usa ka 20-anyos nga suspek nga nailhan sa alyas nga “Kikim” human makit-an sa iyang gisakyang Nissan Urvan ang mga gituohang smuggled cigarettes nga nagkantidad og P1.2 milyon.
Gidala ang suspek sa Kalilangan Municipal Police Station alang sa dokumentasyon, samtang gitugyan sa Bureau of Customs ang mga nakumpiskang kontrabando alang sa hustong disposisyon.
Padayon usab nga giawhag sa kapulisan ang publiko nga isumbong dayon ang bisan unsang kahina-hinalang transportasyon o ilegal nga kalihokan aron mapugngan ang smuggling sa rehiyon.