Gipahigayon sa 4th Infantry Diamond Division, Philippine Army, ubos sa pagpanguna sa Division Public Affairs Office ang tulo ka adlaw nga Social Media News Production Forum didto sa Camp Evangelista, Patag, Cagayan de Oro City.
Gitambongan kini sa 67 ka mga Civil-Military Operations, o CMO, personnel gikan sa nagkalain-laing yunit sa dibisyon sa rehiyon sa Northern Mindanao ug Caraga.
Tumong sa maong pagbansay nga palapdan ang kahibalo ug kahanas sa mga partisipante sa digital communications ug sa paghimo og dekalidad nga social media content nga makatabang sa pagpakaylap sa sakto, napasahon, ug makahuluganong impormasyon.
Lakip sa mga paksang gihisgutan mao ang social media policy, basic Adobe Photoshop, introduction to psychological operations, issue analysis gamit ang Talkwalker ug Perplexity, paghimo og mga social media products, ingon man ang basic photography ug video production.
Sumala ni 4ID Assistant Chief of Staff for Civil-Military Operation, Colonel Ricky L. Canatoy, importante ang padayon nga pagpalambo sa katakos sa mga CMO personnel aron makasabay sa paspas nga kabag-ohan sa information environment ug mas mapalig-on ang responsable nga paggamit sa social media sa paghatag og sakto ug kasaligang impormasyon ngadto sa publiko.