Nakaplagang wala na’y kinabuhi usa ka magtiayon sa Overview, Barangay Palacapao, Quezon, Bukidnon kagahapong adlawa, Hulyo 3.
Anaa na sa advanced state of decomposition ang mga patay’ng lawas sa dihang kini nakaplagan sulod sa ilang panimalay.
Giila sa kapulisan ang mga namatay nga sila Dionisio Yagonia, 64 anyos ug ang iyang asawa nga Agustina Arenas, 66 anyos.
Sumala sa report, nakadawat og impormasyon ang kapulisan mahitungod sa pagkakaplag sa duha ka patay’ng lawas sulod sa ilang balay.
Sa pag-abot sa mga awtoridad sa lugar, nakit-an nga halos dili na mailhan ang mga biktima tungod kay anaa na kini sa advanced state of decomposition.
Matud pa sa kapulisan, hilit ang ilang pinuy-anan ug walay silingan sa duol nga lugar, nga mahimong maoy hinungdan nganong wala dayon sila nakit-i.
Gihangyo na sa imbestigador ang tabang sa Provincial Forensic Unit aron iproseso ang crime scene ug mahibal-an kung adunay foul play nga nalambigit sa insidente.