Pormal nang gisang-at sa Office of the Ombudsman ang kasong plunder ug paglapas sa Presidential Decree No. 46 batok kang Senador Rodante Marcoleta, kanhi Anakalusugan Party-list Representative Mike Defensor, ug uban pang mga indibidwal.
Nag-ugat ang kaso sa pag-angkon ni Marcoleta nga nakadawat siya og kuwarta gikan sa mga donor atol sa iyang kampanya isip kandidato sa Senado niadtong milabay nga eleksyon.
Tungod niini, gilakip usab sa Ombudsman ang mga tawo nga giingong naghatag kaniya sa maong donasyon.
Gipadayon sa Ombudsman ang pagsang-at sa mga kaso bisan pa sa mga pagsaway gikan sa mga supporters sa senador ug sa pipila ka mga miyembro sa Iglesia ni Cristo.
Sa pikas bahin, gipanghimakak ni Ombudsman Jesus Crispin “Boying” Remulla ang alegasyon sa “selective justice” ug gipunting nga wala silay gipili sa pagpatuman sa balaod.
Gipaabot karon ang sunod nga lakang sa Sandiganbayan human sa raffle of cases ug pag-apod-apod sa mga kaso ngadto sa nagkalainlaing dibisyon sa korte.
Posibleng mopagula ang Sandiganbayan og warrant of arrest batok sa senador.
Sanglit mahitabo kini, ang kasong plunder dili mapiyansahan, samtang ang kasong paglapas sa Presidential Decree No. 46 mahimong mapiyansahan.
Gipunting usab sa Ombudsman nga bisan giila niini ang kulturang Pilipino sa “utang kabubot-on,” dili kini mahimong rason aron malapas ang balaod sa pampublikong serbisyo.
Gihangyo sa Tanodbayan ang publiko nga pasagdan ang ebidensya ug ang balaod nga maoy maghukom sa maong kaso, bisan pa sa nagpadayon nga debate ug mga rally nga nalambigit niini.