Nahimong sentro sa atensyon sa kalibutan sa pagkaon ang usa ka sikat nga restawran sa Japan human niini nasakmit ang kampiyonato sa “Japan Fried Chicken Grand Prix” (Karaage Grand Prix) pinaagi sa paggamit sa talagsaon ug karaan nga mantika nga duna na’y panuigon nga 66 ka tuig.
Sumala sa mga report, gigamit sa maong kan-anan ang pamaagi nga perpetual oil o “master oil” sukad pa niadtong tuig 1960. Imbis nga ilisan ug ilabog ang tibuok mantika matag human og luto, ila lamang kining saringan pag-ayo matag gabii ug dugangan og bag-ong mantika pagka-sunod adlaw aron mapreserba ang lawom nga kalami ug kahumot nga natipon sulod sa unom ka dekada.
Bisan pa man og makapabalaka kini paminawon alang sa uban tungod sa isyu sa panglawas, gipasalig sa restawran nga luwas ug limpyo ang ilang proseso. Moagi matud pa ang mantika sa estrikto nga pagsala ubos sa taas nga temperatura aron masegurong mapatay ang bisan unsang kagaw—butang nga naghatag sa ilang fried chicken og talagsaong kalami nga dili makuha gamit ang ordinaryo ug bag-ong mantika.