Tulo ka menor de edad ang nakabsan sa kinabuhi human nagbangga ang ilang gisakyang motorsiklo ug usa ka dako nga truck sa kurbadong bahin sa dalan sa usa ka dapit sa Damulog, Bukidnon kagahapon.
Gideklara nga dead on the spot sa nagsusi nga doktor ang mga biktima nga mag-agaw nga nagpangidaron og 16, 13, ug 10 anyos tungod sa grabeng kadaot nga naangkon sa ulo. Ang tulo pulos mga estudyante diin ang duha kanila anaa sa Grade 7 ug ang usa anaa sa Grade 4.
Subay sa pasiunang imbestigasyon pinaagi ni PCapt. Marlon C. Subrian, ang hepe sa Damulog Municipal Police Station, gibutyag niini nga padulong matud pa ang mga biktima aron magkalos og tubig ug maligo sa wala pa mosulod sa tunghaan tungod aduna silay nakatakdang aktibidad.
Samtang nagbiyahe, nakasugat nila ang usa ka truck nga adunay karga nga mga materyales alang sa pagpananom og tubo.
Sa wala pa masuta nga rason, nawad-an og kontrol ang 16-anyos nga drayber sa motorsiklo hinungdan nga mibangga kini sa wala nga luyong bahin sa truck, rason nga nalatayan sila sa ligid niini.
Nasayran usab sa mga awtoridad nga ang motorsiklo nga gigamit gipanag-iya sa amo sa 16-anyos nga menor de edad ug gikuha lamang kini nga walay pananghid o pagtugot sa tag-iya.
Apan taliwala sa nahitabong trahedya, gikumpirma ni PCapt. Subrian nga nakab-ot na ang usa ka malinawong kasabutan human nagkaatubang ang pamilya sa mga biktima ug ang drayber sa truck.
Sa pinakabag-o nga update nga gihatag sa hepe, gibutyag niini nga nagkasabot ang matag bahin nga mag-amicable settlement na lamang.