Gilauman nga liboan ka mga lumulupyo ug miyembro sa nagkalain-laing sektor ang motambong sa White Ribbon Movement March nga pagahimoon sa EDSA People Power Monument isip pagpadayon sa panawagan batok sa korapsyon ug alang sa paningkamot nga mapanubag ang mga opisyal sa gobyerno.
Ang kalihukan gipangulohan sa Inter-Religious Leaders Council for National Transformation nga gilangkuban sa mga lider sa Katoliko, Muslim, Evangelical, ug Protestanteng simbahan.
Sumala kang Kidapawan Bishop Jose Colin Bagaforo, ang martsa usa ka sibil ug moral nga panawagan ug dili bahin sa partisanong politika, nga nagtumong sa pag-awhag sa gobyerno sa pagbatok sa korapsyon ug sa pagpanalipod sa hustisya.
Gilauman usab nga motambong ang mga mag-uuma, mangingisda, mamumuo, kabatan-onan, ug mga relihiyosong grupo.
Lakip sa ilang mga panawagan ang patas nga pagdumala sa impeachment trial, walay pinili nga imbestigasyon sa mga giakusahan sa korapsyon, ug mga reporma batok sa political dynasties ug manipulasyon sa eleksyon.