Pormal nga giila isip pinakakusog mosinggit sa tibuok kalibutan si Joseph McGrail-Bateup, ang opisyal nga town crier (o tig-anunsyo sa lungsod) sa Canberra, Australia.
Niadtong Mayo, opisyal nga nakab-ot niya ang Guinness World Record alang sa titulong “loudest shout by an individual (male).”
Natala ang iyang makabungog nga siyagit sa gikusgon nga 122.4 decibels.
Ang talagsaong kakusog sa iyang tingog maparehas na sa kasaba sa usa ka rock concert o sa paglupad sa usa ka military jet.
Sa pagpangita sa saktong pulong nga makahatag sa pinakahasg nga decibel, gi-eksperimentohan niya uban sa iyang anak nga babaye ang mga pulong sama sa “quiet,” apan sa katapusan, ang pulong nga “now” ang ilang napili nga maoy mibuak sa rekord.
Luyo sa iyang pagka-sabaan karon, giangkon ni McGrail-Bateup nga hilabihan siya ka maulawon ug hilom nga bata kaniadto ug dili gyud mogawas ang iyang kusog nga tingog.
Gawas nga nahimo siyang world record holder sa natad sa archery niadtong 2019, nadiskubrihan ug nabaid lang ang kakusog sa iyang tingog sa dihang misulod siya sa industriya sa teatro, diin ang pagbansay-bansay nga walay gamit nga mikropono maoy nagtukmod kaniya sa pagpa-project ug pagpakusog og maayo sa iyang tingog.